Sawala Haté

 

Aya nu diharéwoskeun

Mangsa peteng murba

Dina jajantung peuting

Nu kulawu

 

Manéhna lunta muru impian

Nu teu kaur cunduk

Di mana lebah nyangsangkeun kahayang

Satungtung urang

Muru harepan séwang-séwang!

 

Jatinangor, 28 April 2008

 

Léngkah Urang

 

Ngitung waktu nu haben ditiir lampah,

Saléngkah-saléngkah

Geus tepi ka mana lalampahan téh, jungjunan?

Nyawang lalakon nu can kasorang

Papada urang, mingkin lewang haté

 

Kapan urang, cikénéh

Ditagih jangji!

Nu can témbong kelemengna

Pimanaeun urang naur pati

Nu sidik ngadodoho urang!

 

Jatinangor, 28 April 2008